MACELLARIAE ARtis negotiator

MACELLARIAE ARtis negotiator

in vet. Inscr. Ludgun. apud Car du Fresne. Erat autem Macellum, antiquis Latinis Forum, in quo omnia, quae ad victum pertinerent, vaenum ibant: postea sic proprie appellari voluerunt, ubi caro venalis exponebatur. Hincin Glossis macellum, κρεοπωλεῖον et Macellarii, Laniones; quos a mactandis pecoribus dictos vult Donatus in Eunuchum. De iis ita Manil. l. 4. Astron.

Sunt quorum similes animos nec moenia frenent,

Sed pecorum membris media grassentur in Urbe,

Et laceros artus suspendant fronte tabernae,

Luxuriaeque parent caedem, mortesque lucrentur.

Ubi audaces vel παραβόλους indigitari, sine ratione, magnus eius Interpres statuit. Non enim οἱ παραβόλοι, aut ferarum confectores et bestiarii, sed laniones. pecorum membris grassantur in urbe media et pecora membratim discerpunt ac fronte lanioniae tabernae suspendunt discerpta; uti etiam innuit Phaedrus, in Fabb. l. 3. Fab. 5.

Pendere ad lanium quidam vidit simium,

Inter reliquas merces atque obsonia, etc.

Vide Salmas. ad Capitolin. in Gordianis, et supra aliquid voce Culina.